Նախատեսվում է Կոտայքի մարզի Աղավնաձոր գյուղում գտնվող ՀԱԱՀ-ին պատկանող շենքի վերանորոգում և տարածքի բարեկարգում՝ «Ագրոճամբար» ուսումնական նորարարական կենտրոն հիմնելու նպատակով:

Նորարարական գյուղատնտեսական գիտելիքների և հմտությունների խթանման համար «Ագրոճամբար»-ում կկազմակերպվեն ամառային դպրոցներ, միջոցառումներ, կարճ դասընթացներ: Ճամբարային ծառայություններ կմատուցվեն Հայաստանի ազգային ագրարային համալսարանի (ՀԱԱՀ) ուսանողների ու շրջանավարտների, ինչպես նաև մասնագիտության մեջ կատարելագործվել ցանկացող կամ գյուղատնտեսության ոլորտում ներգրավված երիտասարդ մասնագետների համար:

Սննդամթերքի թափոններն ու կորուստները նվազագույնի հասցնելու և երիտասարդ սերնդի շրջանում առանց թափոնների մշակույթ ներդնելու համար ԱԳՐԻ ՔԵՄՓ-ը նպատակ ունի ընդունել շրջանաձև տնտեսության սկզբունքները:

Նախանշված գործողությունները միտված են գիտելիքների և փափուկ հմտությունների զարգացմանը՝ ՀԱԱՀ ուսանողների, շրջանավարտների, անձնակազմի, գյուղատնտեսությամբ հետաքրքրված երիտասարդների շրջանում: Մասնակիցները կծանոթանան գյուղատնտեսական նորարարական մոտեցումներին, կստանան ժամանակակից գիտելիքներ ու հմտություններ, որոնք անհրաժեշտ են շուկայի պահանջարկի բավարարման և մրցունակ լինելու համար: Դա ձեռք կբերվի գործնական կարճաժամկետ մասնագիտական դասընթացների և հմտությունների ձևավորման, ինչպես նաև ամառային դպրոցների միջոցով:

Կոոպերատիվների անդամների, ՓՄՁ-ների, ֆերմերների գիտելիքների և հմտությունների հզորացման ու ագրոբիզնեսի ընդլայնման միջոցով ԱԳՐԻ ՔԵՄՓ-ը ձգտում է նպաստել ՀՀ կառավարության տնտեսական խթանման ծրագրերի հաջող իրագործմանը՝ Հայաստանում COVID-19-ի ընթացքում և դրանից հետո տնտեսության վերականգնման նպատակով, մեղմացնելով տնտեսական ցնցումները տարածաշրջանում և նպաստելով գյուղատնտեսության զարգացմանը։

Կոոպերատիվների անդամների, ՓՄՁ-ների ու ֆերմերների կարողությունների հզորացում. Ծրագրի շրջանակում կիրականացվեն դասընթացներ, որոնք կխթանեն կոոպերատիվների անդամների, ՓՄՁ-ների և ֆերմերների գիտելիքների ու հմտությունների զարգացումը, ինչը կնպաստի գյուղատնտեսության ոլորտում ռեսուրսների օպտիմալացմանը, արտադրողականության բարձրացմանը, որակյալ արտադրության ընդլայնմանն ու մրցունակության բարձրացմանը։

Տեխնիկական աջակցություն կոոպերատիվներին, ՓՄՁ-ներին ու ֆերմերներին Կիրականացվի համաֆինանսավորում և կտրամադրվի տեխնիկական աջակցություն առավել ակտիվ ու հաջողած կոոպերատիվների անդամներին, ՓՄՁ-ներին ու ֆերմերներին` բիզնեսների հզորացմանը, արտադրողականության աճին և գյուղական ձեռնարկատիրության զարգացմանը նպաստելու նպատակով:

Ծրագիրը կնպաստի առկա տնտեսական գենդերային բացի վերացմանը, բարձրացնելով գյուղատնտեսական նորարարական լուծումների և տեխնոլոգիաների հասանելիությունը, ինչը կնպաստի Հայաստանում գյուղատնտեսության բնագավառում արտադրողականության բարելավմանը և տնտեսական զարգացմանը։

Կին ֆերմերների և ագրոձեռներեցների կարողությունների զարգացում Ելնելով գյուղատնտեսության ոլորտում նորագույն ու նորարարական լուծումների վերաբերյալ կարիքների գնահատման արդյունքներից` ծրագիրը կմշակի արտադրողականության արդյունավետությանը և գյուղատնտեսական նորարարություններին կանանց հասանելիությանը նպաստող վերապատրաստման մի շարք մոդուլներ: Այդ մոդուլներով կանցկացվեն դասընթացներ՝ ագրոձեռներեց կանանց, կին ֆերմերների, տեղական ինքնակառավարման մարմինների ներկայացուցիչների համար:

«Ագրիթոնների» կազմակերպում՝ նորարարական արտադրանք և ծառայություններ գեներացնելու ու մասշտաբավորելու համար. Ծրագիրը կկազմակերպի «Ագրիթոններ»՝ մրցույթ և յուրահատուկ հարթակ, որը կմիավորի գյուղատնտեսության մասնագետների, կին ագրոձեռներեցների, ծրագրավորողների, ինժեներների և այլ մասնագետների՝ գյուղատնտեսության ոլորտում արտադրողականության և պահանջարկի խթանման ու նոր լուծումների հայտնաբերման նպատակով: Ստեղծագործ և խթանող մթնոլորտ ապահովող այս մրցույթ/հարթակը հնարավորություն կտա Հայաստանի տարբեր վայրերից ժամանած թիմերին, որոնց գաղափարներն ուղղված են նորարարական լուծումներով գյուղատնտեսության ոլորտի արտադրողականության խթանմանն ու գյուղատնտեսության ոլորտի առկա մարտահրավերների հաղթահարմանը՝ մենթորների և փորձագետների ղեկավարությամբ կատարելագործել իրենց գաղափարները, արտադրանքը կամ ծառայությունները: Առավել նորարարական, ստեղծագործական, արդյունավետ և կայուն արտադրանքներն ու ծառայությունները կստանան ֆինանսավորում` զարգացման և խթանման համար:

Հետազոտությունների մեջ ուսանողների ներգրավվածության խթանում Ծրագիրը կնպաստի ուսանողների ներգրավմանը գյուղատնտեսական հետազոտությունների մեջ` ՀԱԱՀ ուսանողներին տրամադրելով մասնագիտական ուղղորդում և հետազոտական փոքր դրամաշնորհներ: ՀԱԱՀ-ի անձնակազմի խորհրդատվությամբ ուսանողներն իրենց հետազոտությունները կանցկացնեն ԱգրիՀԱԲ-ի, ՀԱԱՀ-ի ցուցադրական ջերմոցի, ինչպես նաև ICARE-ի և ՀԱԱՀ-ի այլ ուսումնական տարածքներում:

«ԱգրիՀԱԲ» հարթակի հիմնում և զարգացում. «ԱգրիՀԱԲ»-ը ստեղծագործական հարթակ և արտադրամաս է՝ գյուղատնտեսական և ագրոտեխնոլոգիական արդի գաղափարների, արտադրական նախատիպերի, ինչպես նաև արտադրանքի ու ծառայությունների ստեղծման, զարգացման ու առաջխաղացման համար: Այն նաև ծառայելու է որպես գործնական պարապմունքների և համապարփակ դասընթացների ուսումնական կենտրոն ու արտադրամաս՝ Հայաստանի երիտասարդների համար, ովքեր ցանկանում են սովորել և փորձարկել արդի գյուղատնտեսական տեխնոլոգիաները։ Բացի այդ, այս հարթակը կօգնի խթանել կանանց ներգրավվածությունն ու առաջնորդությունը ագրոտեխնիկական հետազոտություններում, նորարարություններում և ձեռներեցության ոլորտում: «ԱգրիՀԱԲ»-ը տեղակայվելու է ICARE-ին պատկանող շինություններում և հարակից գյուղատնտեսական հողամասում, որը գտնվում է Երևանի մերձակայքում՝ Պռոշյան համայնքում: